房屋 – 最切身嘅問題。地產霸權係罪魁禍首。移山填海係英國人教落嘅方法，到咗今日，環保更重要，事實又有道理，保護未來天然資源，總比短線炒作重要，睇下今日大陸空氣，水質情況就知。

有兩大核心要攻破，大地主-地產發展商，擁地自重，唔起唔賣。小地主-小業主嘅自私心態，任何影響自己層樓樓價嘅計劃都一概反對。

對付呢兩種cancer，只有一種法寶，就係擇善固執，勇往直前，誓不低頭嘅決心。

天馬行空咁諗，所有現有政府地分40%出嚟賣比發展商起豪宅。另，30%卽係起公屋。30%即起居屋。

人人都可以用強積金買樓。

私人發展商起嘅樓，一定要預留10%以市租半價租比低收入單身青年。

大地主唔肯買？仲好，全部撥去公屋，居屋。唔起？三年內一定要起，否則罰地價10%.逐年累升。

4年內人人有屋住。

將來？

我屋企對開有兩個小島： 大小青洲。天馬行空咁諗 ，係其中一洲起公屋。由屋民經營街渡來往堅尼地城。香港有好多冇人住小島，何不加以利用？唔方便？以前沙田禾輋瀝源、華富夠唔方便啦，冇人肯去住，而家？？？

仲有 ，買起所有冇人工廈，拆咗再起，或者改裝成 NY式 loft ，又可以住人。消防例？政府負責改建。

嘩，唔賣地，政府就冇收入？

稅制改革！累進式加利得稅，生意賺得多加得多。仲有俥侈品稅，所有高價名牌貨品，抽重稅。橫掂有錢佬唔志在。

其實香港大把地。今期突破雜誌搵咗好多地出嚟。問題係政府同發展商，加埋既得利益者，為咗利益，係有預設隱閉目的之下，做啲嚇人嘅數據出嚟。

有好多蚊形地，可以起單人宿舍比長者同青年，混合居住，融和關係，互相照應。

香港政府啲高官，好似忘記咗佢哋嘅人工同洗緊嘅錢，係香港人嘅錢，管緊嘅，係香港人嘅地。佢哋只係代我哋管理，我哋先係主人。所有政府機構嘅真正主人係我哋。包括香港電台。

大家好似忘記咗「公僕」兩個字點寫。

Jacob Yu(21 May)