創意論政 （一）
近十年人人都將「創意」二字放係口邊，特首、高官、商賈、傳媒、百姓•••人人講、人人吹。施政報告財政預算都要講創意，但乜嘢係創意？
稍為用下腦就話有創意？！
抄完改少少就話係二度創作？
政府大談創意，吹三捧四，但政府的制度本身就最看扁創意行業。政府部門裡行政人高高在上，設計師就底三下四。EO 可以做到AO 做到SAR CEO、AM可以做到CM做到 Dir. 、Engineer 都可以做到署長，攞房津高福利。Designer 呢？叫 technical officer, 最高做到 CTO, 薪級點去到啱啱唔俾你攞 Housing allowance.
制度上已認定設計師低級過行政人，仲大言炎炎吹高創意。
眼見決策高層缺乏創意，稍為有新啲嘅思維意見就話「未有先例」，「未成熟」，「沒可能」，「不設實際」•••等借口。一句講哂，只係唔想做。
事實上，真正嘅創意，唔多唔少都一定包含呢啲「借口」嘅特質。
“Think out of the BOX” 唔係個個都得，因為唔安全，可能會輸，挑戰大風險高。仲要睇有冇天份。
所以，政策來來去去都係嗰幾樣，因循，解難水準低。連我最敬仰嘅高永文都捉襟見肘。
作為一個從事演藝創作嘅小市民，喺冇歷史、冇包伏嘅情況下，以think out of the box 的原則，加上頼聲川式嘅創意，嘗試針對現今香港最 hit 難題比一啲「不設實際」嘅睇法。
普選特首？人人一票選自己想選嘅人？冇問題。
老實講，現實啲，環顧今日香港，根本冇一個人有魄力，有智慧，有才幹，有魅力做到香港特首。除咗劉德華。佢係我心目中唯一有資格嘅 （我認真㗎，劉華嘅粉絲不妨勸下佢，為香港好，列根得，Arnold 得，點解佢唔得？），可惜佢唔會肯做！！！
所以，我建議放棄港人治港。
一個同香港冇 la 冇 lun 嘅人，冇利害關係，唔怕大地主，同以前港督質感上相似。不過，要由香港人揀。
候選人係內地眾多中央高官，同省長級人物，仲有，完全唔介意香港市場嘅國內中資國際大企業嘅大老闆。唔駛怕李氏效應。
選出嚟嘅人，北京一定冇問題，所以唔駛預選，唔駛提名委員會。
由行政、立法，同司法，三院成員個別提名，之後再有一百個香港出生嘅人和議，就可以正式成為候選人。候選人要嚟香港居住一個月，硏究同拉票，之後在電視發表政綱，同香港人辯論，同對手辯論，之後，香港人一人一票公投特首。
仲有，一年試用期，一年後，再公投，ok就継續，唔ok就冇得留低。由第二名補上。
選出嘅人，北京中央應該冇問題，亦唔駛睇西環面色，更不怕姓李嘅人。亦係我哋一人一票選出嚟，唔對路仲可以換人。仲想點？起碼好過新架坡。
我第一個選前總理朱鎔基。
下次講房屋問題。
余振球 2013 April SG